الشاعر حسن فالح..
اذا كل العيون تشوف بس ردنه الضمير اليصحه من نومه
يهم بهموم هاي الناس
اي والله وتصير همومها همومه
هاي ولايتي العاشنت مآسي اسنين
من ابسط حقوق البشر محرومه
امس جان السبب موجود
ابنار وحديد وجور محكومه 
جي حظها جبير ابيرغ الثوار
هي ام كل شراره وهاي معلومه
فلا ردت ذليله بخاطر المكسور
لاليل الكدر يحجبها بغيومه
يكون اليصل كرسيها ابن بي جود
موبس وصل ليه ايبدل اهدومه
عنده اجفوف اوادم مو مخالب ذيب
تنهش بالجروح المنها مالومه
ولايبني هرم من شاشة التلفاز
وبكلبه النوايا ركطه مسمومه
ابركبتكم ذمم كل دم شهيد الطاح
اذا ماتعله داره و.تظل مهدومه
هذا انه اعله حالي واحجي بالمكشوف
واعمم ماابالي السامني ابسومه
عمري ما كتبت اشعاري للسلطان
لامره اركصتله ولاني من كومه
ولامنقوله عندي وخوفي عالمنقول
بس اهموم عندي ابكلبي مضمومه
باسم حيدر اجيتو وكلنه يالله
طلعتو ازلام خيبه وذمم معدومه
درجعو منين اجيتو وعدكم التسهيل
تأ شيرة مرور من امس مختومه
وكافي من النفاق وخلو نبني البيت
نبدي من البشر لن كلها مهدومه
خل انلم شملنه ونذكر الرحمن
ونرجع وطنه الضاعت ارسومه
وكل مذنب نحطله الطينه عالخدين
مو عين التشوف اولسن ملجومه
وكلشي ينبني والمزمنات اتطيب
بس علة الضمائر كون محسومه