الشاعر حسن الغريباوي


اريد ابعد.
ولك ياليل اجيتك فكلي ذرعانك.
اريد دموعي ابلل بيهن اردانك.
ولك مليت من روحي وكرهت الناس.
ماصادفني وجه الله بحجي اهل الله اشتهيت الكاس.
ولك ياليل غنيلي غنه السبعين.
ارد ارتد واعوف الدين.
واتوضه برضاب شفاف الحديثات.
شفت ادم توضه بشجرة التفاح 
مامتوضي جفه بدين.
ولك ياليل اخذني وﻻترد بيه.
وحني زلوفي بجفوفك حجي الكره كبر بيهن.
خدود التين تروه هواي إذا بلبل يناغيهن.
تره شتاكيت وك ياليل اريد ازغر.
ولو عمري جزاه الطيش بس مشتاك
 هاي زنودي بطراف الزلف تخدر.
وانته ادره النده شما عله بجف الغيم 
عله طاري الورد يطوطح ويسكر.
وتره الحسره وطن للفاكد الشمه.
وتره بنادم جزيرة بوم إذا ماينلبس مثل الكﻻده
 بجيد اذا مايلكه كذله تطشره وتلمه.
إذا شفتينه مابيهن اثر لثمه.
تره العاشك مثل هاون يهلهل لمن تلجمه.
وك ياليل هاي الناس ماتفهم حجي الفاكد.
محد يعرف اكرام اليموته الشوك مثواه بحضن ولفه.
عشت بيناتهم عيشة ذنب قابيل وي ادم.
محد كحل عيوني بحلم صدكي.
محد لوهباني بنار المﻻكه حرورة نار 
ملكاهم مطر بالصيف.
وماصادفني واحد مثل محبوبي
إليكاسر خمر شفتينه بخمر شفتي.
ويسكر من خدرنه الكمر والنعناع.
واطشر خرز سبحه ترس حضنه.
ويلمني خدر خصره.
ويعلكني شمعدان اعله نهده.
وانزف لاخر نفس بيه.
واموت بﻻصده وﻻصوت.
مثل ماي الكصص من يوكع بﻻ صوت.
اي ياليل اخذني لديرة نهوده
 تراني هواي مشتاك لهذاك الموت..
تراني هواي مشتاك لهذاك الموت.