*   انسان  عيشي انسان.. موتي انسان واعطشي اشما يمر عاشور خاطر يرتوي الايمان 
واشبعي اخلاق بالج منهن اجوعين  بالوجوه المعوزه املثكه البيبان
مو كلشي انمدح معناها ما مذموم
ينذم بالمدح لو صوفر البستان واتحملي حجي نكل الحجي مريود بس من ينترس يثكل حجي الميزان وافرحي الليل من يجمع ابطاريج  اهي الكهوه التثكل خفة الفنجان ميزي ابينهن عدنه البرد والصيف اليحتر من خجل معناها مو دفيان لمي الصيف كله وفصلي منه اثياب 
ودفي من بعد لو صاحبج بردان واحتاجي الرخيص العبره تالي اصير الوادم بالدفن تحتاج لتربان
مو كلشي كبر يبتدي وهوه اجبير
تره صيت النهر يكبر من الغركان عيشي ابعافيه اليتمرض ايملو 
اشما يكبر جسد يستزغره الدفان اخذي امرايتي وخمي البشر طولين الحمد لله لون تلكيلهم قمصان 
وي قرص الشمس مانفع طاري الجوع بس قرص الخبز يفتهم للجوعان وهاي اولايتي البيها العشك موخوش تحب الله لجنها امعاشره الشيطان.