للشاعر حيدر الجابري 

الطير من يفرد جناحه بروحه عيد
الگاع تكشخ بلعشب لو مرهه ماي
وانه طير وفارد جناحاتي بيك
وروحي گاع مفطره وزايد ظماي

وانته مزنه ولو تمر بروحي اعيش
يخظر بروحي عشب يكثر فياي

مرني غيمه واخذ من روحي ربيع
ومرني ظحكه وشوف تغريدي وغناي

مرني شوگ وشوف ڜوگي البي لهيب
وشوف چم قيس البقو لجلك وراي

مرني طيف ابيقضى اخذ كل السنين
كلشي الك بس خلي گطرت مستحاي

فَرهَد ابروحي الهجر حد ماصفيت
هيمه يرده ومايصح بس العياي

روحي ضلمه وعمري غافي بحظنه ليل
ولا شفاگ الينطر ويكشف سماي

انته كللي ومن ترمرني بخير اعيش

وترجع اسنيني وارد باول صباي

نعمت النسيان عندك ياهناك
وانه صار سنين بس ذكرك غطاي

تيهت روحي وتهت من دوريت
لگيت روحي متيهه وتدور وراي

دورت نتاگ ريتي وحصليت
ريحه منك باقيه تجدد هواي

لو تهب ريحك ملح اشهگ هواك
ولو جرح بلريه هم ملحك دواي

راح اضل تايه وادور ما اهيد
هم ترد والگاك فدوه انطيني راي
وكون مانيتك ترد سولفهه هيچ
حته اموت الخاطرك وبمشتهاي