(بياض ڰلوبنه)



ركضت بحرگتي الملگاچ بلكي افحط. 
      واگولن تعباني جفاچ  واتخربط.
 
ولكن بالعكس رديت للعشرين.       گمت اكل بروحي وصرت ذيب امعط. 

حاچيتچ  يشوگ اصباي شتگولين. 
   كون ايرد ضهر مشحوفنه عاللشط.
 
ونفس ذاك الغروب الفوگ خدچ صار 
      وغيم مستحاچ وخاطرچ  نگط. 

تلاحگت  البقى من الحيل مامبلول. 
    كسرت خاطري الوادم زرعهم غط.
 
گلتيلي وحياتك گلبي لملگاك
     غاير دوم كل  جرت رسن ينشط. 

وضحكتي وضحكت ولايات ونسريت  سرب من النوارس فوگ رمشچ حط. 

تناغينه همس والشوگ من يحتام. 
     يركض حيل يكره  شغل  المگمط.

وكتلچ مو مشط يجرح حريرچ هذا. 
       الفجر وي الندى وبالريح يتمشط

وگلتيلي خذانه الشيب گتلچ لا. 
     بياض اگلوبنه  اعلروس يتسلط. .