شا بكني البجي وتايه براسي الراي

ومتاني الهجر يخلص وارد لصباي

واتنفس هواك منين ماحسك

 واطربلك طرب بدوي على دكت ناني

يالمخلي الدمع ووشالته يطيحن

تعال وياي .

تعال الروح مشتاكه النداك هواي

تعال وخل اذل كلمن رضا بمبجاي

ترى الوادم اذمه الزين من يبجي

وكون على الجرح يصبر ولايحجي.

وأنه انذميت بفراكك يطاري الهيل

ولاموني على عشكك ناس تعرف بالحجي وتندل

وكلولي السنابل تكره المنجل

وكلولي الورد ساعات اله ويذبل

وكلولي التحبه عليك يدلل

واحبنك. واحبنك. واحبنك .ولا جني وازود أكثر

رضيت بكلشي بس ارجع

بس ارجع واشوفنك

بس ارجع واشبكنك

اي درجع ...

تعال وكودني بجفك واكودنك

ونطاول كبال الشمتو بخلك

واسولف سالفة عميان ومصدك الشوف يعود للمامش ضوه بعينه

وأبدي الدنيه الك بس ياس والحنه بصوانينه

ويزفون الكمر على اليل ونرد نسمع لغانينه

(حن  وانه احن)

واشوك يترس كل سواجينه...