قصيدة بعنوان " نسو بچفوفي غيم " للشاعر حيدر الجابري

ابو فاضل جيش ياهو يلاگي جيش

علّما حيد على فنون الحرب

 

ترجف الشجعان والعسكر يميل

بس مجرد ينوي للحومه يطب

 

عينه تلگط وين الاشوس والثگيل

وسيفه يلگف وين الاشرس والصعب

 

هيچ مقياسه مثل مقياس ابوه

لمعه بعيونه ترجّف كل گلب

 

ابو فاضل سمعته زينب يصيح

آنه اخو زينب عليهم راح اصب

 

نار من راسي الحمه وبركانه ثار

اليوم اخلي الكون بيهم ينگلب

 

مانعين الشط نسو بچفوفي غيم

وگصتي منعرگ منلكوثر تصب

 

اليوم اعطشهم عطش يوم الحساب

وريح اصيرن صرصر وبلحومه اهب

 

لنهه زينب نادته عفيه ابن ابوي

عفيه اخيي المثل ابوو  ماينغلب

 

عفيه اخوي الامنت كل ستري بيه

مصيّد ادريبك كفو وكلش ذرب

 

التفت گلهه ام عون نامي وقري عين

طول مابچفوفي بتاري الصلب

 

دونچ اطوي الگاع واسحبهه السماء

وغيم اصير وعلخيم لمطر عذب

 

انه ساعه مصفره وتوقيتي حان

البيهه ربچ واعد الشايل ذنب

 

كالت ادري بساعتك موعدهه هاذ

وادري دورك تظحيه وحب بنلعب

 

وادري راح اتخط قصص بارض الطفوف

بساعة ترسمهه ودهر ما تنكتب